काठमाडौँ । सिन्धुलीको इलाका प्रहरी कार्यालय खुर्कोट हिरासतमा २३ वर्षीय श्रीकृष्ण विकको मृत्यु प्रकरणको छानबिन गर्न नेपाल प्रहरीले ५ सदस्यीय समिति गठन गरेको छ।
प्रहरी महानिरीक्षक दान बहादुर कार्कीले राष्ट्रिय प्रहरी प्रशिक्षण प्रतिष्ठानका प्रहरी नायब महानिरीक्षक (डीआईजी) दिनेश कुमार आचार्यको संयोजकत्वमा उक्त समिति गठन गरेका हुन्।
समितिमा प्रहरी उपरीक्षक रबिन्द्रनाथ पौडेल, प्रहरी निरीक्षक इन्द्रजित सुनार र प्रेम रेग्मी तथा प्रहरी नायब निरीक्षक राजेश्वर सापकोटा सदस्य रहेका छन्। समितिलाई घटनाको तथ्यगत एवम् वस्तुनिष्ठ छानबिन गरी ७ दिनभित्र प्रतिवेदन पेस गर्न कार्यादेश दिइएको छ।
जबरजस्ती करणी मुद्दामा अनुसन्धानका लागि सिन्धुली जिल्ला अदालतबाट म्याद थप भई न्यायिक हिरासतमा रहेका विक गत वैशाख ७ गते हिरासतको शौचालयमा झुण्डिएको अवस्थामा फेला परेका थिए।
उपचारका क्रममा उनको मृत्यु भएपछि घटना शङ्कास्पद रहेको भन्दै विरोध प्रदर्शन भइरहेको थियो।
छानबिन समिति गठन भएसँगै पीडित पक्षले गरिरहेको आन्दोलन तत्कालका लागि स्थगित गरिएको छ।
सिन्धुली हिरासत मृत्यु प्रकरण : न्यायिक छानबिन माग, घट्ना शंकास्पद
