शारीरिकरुपमा अशक्तता भएका व्यक्तिहरुलाई बैंक तथा वित्तीय संस्थाबाट लिने सुविधामा झन्झट भएको वक्ताहरुले बताएका छन् ।
शुक्रबार नेत्रहीन महिला संघ नेपालद्वारा काठमाडौंमा आयोजित आपांगटा भएका महिलाहरुको आर्थिक अधिकार प्रवर्द्धन, वित्तीय न्याय र समावेशीकरणका लागि सरोकारवाला र पत्रकारबीच आयोजित अन्तरक्रिया कार्यक्रममा बोल्दै वत्ताहरुले यस्तो बताएका हुन् ।
कार्यक्रममा सहभागी वक्ताहरुले दृष्टिविहीनहरुलाई मोबाइल बैंकिङ सेवाबाट बन्चित गराएको, आफ्नो नाममा खाता खोल्न समस्या रहेको र कारोबारमा पनि समस्या रहेको बताएका छन् ।
शारीरिकरुपमा अशक्त भएका कारण विभिन्न सेवा तथा सुविधाबाट बञ्चित हुनु परेको सहभागीहरुले बताए । शारीरिकरुपमा अशक्त भएकै कारण आफ्नो क्षमताको समेत अरुले मुल्यांकन गरिदिने, आफुले सक्ने काम समेत गर्न नपाउने लगायत समस्या देखिएको उनीहरुको गुनासो छ ।
कार्यक्रमकी प्रमुख अतिथि सांसद तोसिमा कार्कीले संविधानले निर्दिष्ट गरेको मौलिक अधिकार अपांगता भएको व्यक्तिमा लागू हुनुपर्ने बताएकी छिन् । उनले अपांगता भएकाहरुलाई निशुल्क रुपमा सेवा प्राप्त गर्नुपर्ने भए तर यो कानुन कार्यन्वयन भने नभएको गुनासो उनको थियो।
बैंकहरुले पनि अपाङ्गता भएकाहरुलाई डिजिटल बैंकिङ्गको व्यवस्थापन उचित रुपमा हुनुपर्ने उनले बताइन् । अपाङ्गता भएकाहरुको क्षमतामा नजर अन्दाज गरि सरकारले उचित रोजगारको व्यवस्थापन गर्नुपर्ने उनको भनाइ थियो ।
विभिन्न रोजगार व्यवसायीहरुले अपाङ्गताभएका व्यक्तिहरुलाई रोजगारको व्यवस्था गर्नुपर्नेमा पनि उनले जोड दिइन् ।
कार्यक्रममा सांसद डा. तोसिम कार्की, नेपाल राष्ट्र बैंकका सहप्रवक्ता नारायणप्रसाद पौडेल लगायतको उपस्थिति रहेको थियो ।
अर्थ सन्जाल