वीरगञ्ज। नेपालमा विद्युतीय सवारीसाधन (ईभी) प्रतिको आकर्षण तीव्र रूपमा बढ्दै गएको देखिएको छ। चालु आर्थिक वर्षको पहिलो १० महिनामा मात्रै वीरगञ्ज नाका हुँदै ४ अर्ब २ करोड रुपैयाँभन्दा बढी मूल्यका ईभी आयात भएका छन्, जुन अघिल्लो वर्षको तुलनामा उल्लेखनीय वृद्धि हो।
वीरगञ्ज भन्सार कार्यालयका सूचना अधिकारी उदयसिंह विष्टका अनुसार चालु आवमा १५ हजार २७१ थान विभिन्न प्रकारका विद्युतीय सवारीसाधन आयात भएका छन्। अघिल्लो आर्थिक वर्षको सोही अवधिमा भने ९ हजार ४२ थान मात्रै ईभी आयात भएका थिए। त्यसबेला आयातको कुल मूल्य १ अर्ब ६५ करोड रुपैयाँ थियो।
यसरी हेर्दा चालु आवमा ईभी आयात मूल्यको आधारमा मात्रै २ अर्ब ३७ करोड रुपैयाँले वृद्धि भएको छ, जुन करिब १४३.६० प्रतिशतको उल्लेखनीय वृद्धि हो। भन्सार कार्यालयका अनुसार यो वृद्धि नेपालमा विद्युतीय सवारीसाधनको प्रयोग विस्तार हुँदै गएको स्पष्ट संकेत हो।
आयात बढेसँगै राज्यको राजस्व संकलनमा पनि सकारात्मक प्रभाव परेको छ। गत आवमा यस नाकाबाट ईभी आयातबाट ८१ करोड ४७ लाख रुपैयाँ राजस्व संकलन भएको थियो। यद्यपि चालु आवको विस्तृत राजस्व तथ्यांक सार्वजनिक भइसकेको छैन, तर आयातको मात्रामा भएको वृद्धि अनुसार राजस्व पनि उल्लेखनीय रूपमा बढ्ने अनुमान गरिएको छ।
विशेषज्ञहरूका अनुसार विद्युतीय सवारीसाधनको आयात वृद्धि हुनुमा केही प्रमुख कारण छन्। इन्धनको मूल्य वृद्धि, वातावरणमैत्री सवारीसाधनप्रति सरकारी नीति, कर तथा भन्सारमा दिइएका छुट, तथा निजी क्षेत्रको आक्रामक बजार विस्तार प्रमुख कारण मानिन्छन्।
त्यस्तै, पछिल्ला वर्षहरूमा नेपालमा चार्जिङ पूर्वाधार विस्तार हुँदै गएको र उपभोक्तामा ईभीप्रति विश्वास बढ्दै गएकोले पनि आयात बढेको हुनसक्ने आंकलन गरिएको छ।
