काठमाडौं । नेपालको सबैभन्दा ठूलो धागो उत्पादक कम्पनी रिलायन्स स्पिनिङ्ग मिल्स लिमिटेडले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ । विवरणले कम्पनीको आम्दानीमा सामान्य वृद्धि भए पनि नाफामा उल्लेखनीय गिरावट आएको देखाएको छ ।
चालु आर्थिक वर्षको चैत मसान्तसम्म कम्पनीले ७ अर्ब ४६ करोड रुपैयाँ सञ्चालन आम्दानी गरेको छ, जुन गत आर्थिक वर्षको सोही अवधिको ७ अर्ब ३९ करोड रुपैयाँको तुलनामा झिनो वृद्धि हो । तर, उत्पादन लागत बढ्दै ६ अर्ब ५१ करोड रुपैयाँ पुगेपछि यसको प्रत्यक्ष असर नाफामा परेको छ ।
कम्पनीको खुद नाफा १७.७ प्रतिशतले घटेको छ । गत आर्थिक वर्षको चैतसम्म ३२ करोड ४२ लाख रुपैयाँ नाफा कमाएको कम्पनीले चालु वर्षको सोही अवधिमा २६ करोड ६८ लाख रुपैयाँ मात्र नाफा आर्जन गरेको छ । त्यस्तै, कुल मुनाफा पनि १ अर्ब २ करोड रुपैयाँबाट घटेर ९४ करोड ८६ लाख रुपैयाँमा सीमित भएको छ ।
कम्पनीले ऊर्जा संकटलाई प्रमुख चुनौतीका रूपमा औंल्याएको छ। नेपाल विद्युत प्राधिकरणबाट भइरहेको अघोषित लोडसेडिङका कारण उत्पादन प्रभावित भइरहेको जनाएको छ । साथै, डेडिकेटेड र ट्रंक लाइनको विद्युत महसुलसम्बन्धी विवाद पाटन उच्च अदालतमा विचाराधीन रहेको छ ।
अन्तर्राष्ट्रिय बजारमा नीतिगत परिवर्तन र अमेरिकी डलरको विनिमय दरमा हुने उतारचढावले कच्चा पदार्थको मूल्यमा असर पारेको कम्पनीले जनाएको छ । २२ करोड १० लाख रुपैयाँ वित्तीय खर्चले पनि नाफामा थप दबाब सिर्जना गरेको छ । कम्पनीको चुक्ता पूँजी १ अर्ब ९० करोड रुपैयाँ रहेको छ भने ७ अर्ब ५५ करोड रुपैयाँ जगेडा कोषसहित वित्तीय अवस्था सन्तोषजनक रहेको देखिन्छ ।
