क्रिकेटर करण केसी कारबाहीमा, एक खेल प्रतिबन्ध

काठमाडौं । प्रधानमन्त्री कप एकदिवसीय क्रिकेट प्रतियोगितामा सहभागी क्रिकेटर करण केसी कारबाहीमा परेका छन् । नेपाल क्रिकेट संघ(क्यान) ले नेपाल पुलिस क्लबका खेलाडी करणले सामाजिक सञ्जालमार्फत व्यक्त गरिएको अभिव्यक्ति खेल भावना विपरीत ठहर गर्दै कारबाही गरेको हो ।

क्यानले जारी गरेको प्रेस विज्ञप्तिअनुसार उनलाई एक खेलका लागि प्रतिबन्ध समेत लगाएको छ ।

सम्बन्धित सरोकारवालासँग समन्वय गरेर गरिएको निर्णयअनुसार केसीलाई एक खेलमा सहभागिता जनाउन नपाउने गरी निलम्बन गरिएको हो । साथै उनलाई उक्त खेलको १०० प्रतिशत म्याच शुल्क बराबर जरिवाना पनि तोकिएको क्यानले जनाएको छ।