काठमाडौं। चीनले बिहीबार इजरायली हवाई आक्रमणमा इरानी राष्ट्रिय सुरक्षा प्रमुख अली लारिजानीको हत्या भएको घटनाको कडा निन्दा गर्दै यसलाई ‘अस्वीकार्य’ ठहर गरेको छ।
बेइजिङ इरानको साझेदार भए पनि अमेरिकी सैन्य अड्डा भएका खाडी राज्यहरूमाथि तेहरानले गरेको आक्रमणको पनि आलोचना गरेको छ।
चीनको विदेश मन्त्रालयका प्रवक्ता लिन जियानले पत्रकार सम्मेलनमा भने, “हामीले सधैँ अन्तर्राष्ट्रिय सम्बन्धमा बल प्रयोगको विरोध गरेका छौँ । इरानी राज्य नेताहरूको हत्या र नागरिक लक्ष्यहरूमा आक्रमण गर्ने कार्यहरू अझ अस्वीकार्य छन्।”
उहाँले सम्बन्धित पक्षहरूलाई तत्काल सैन्य कारबाही बन्द गर्न र क्षेत्रीय स्थिति नियन्त्रण बाहिर जानबाट रोक्न आग्रह गरे।
फेब्रुअरी २८ मा सुरु भएको युद्धका क्रममा सर्वोच्च नेता अली खामेनी र अन्य वरिष्ठ व्यक्तिहरूको मृत्युपछि लारिजानी मारिने सबैभन्दा उच्च प्रोफाइल इरानी अधिकारी थिए। चीनले यस घटनापछि आफ्नो मध्यपूर्वीय विशेष दूत झाई जुनको भ्रमणलाई विशेष महत्त्व दिएको छ। उनले साउदी अरब, संयुक्त अरब इमिरेट्स, बहराइन, कुवेत र इजिप्टमा शीर्ष अधिकारीहरूलाई भेटेर युद्धमा मध्यस्थता प्रयास गरिरहेका छन्।
प्रवक्ता लिनका अनुसार झाईले भ्रमणमा गैरसैन्य लक्ष्यहरूमा आक्रमण नगर्न र ढुवानी लेनहरूको सुरक्षा सुनिश्चित गर्न जोड दिए। चीनले बेइजिङबाट जारी कूटनीतिक प्रयासलाई जारी राख्ने बताएको छ र इरान, लेबनान, जोर्डन र इराकमा मानवीय सहायता प्रदान गर्ने निर्णय गरेको छ।
