काठमाडौं। ऊर्जा, जलस्रोत तथा सिँचाइ मन्त्री कुलमान घिसिङले सेवाग्राहीसँग घुस माग्ने, मोलमोलाहिजा गर्ने र अनावश्यक दुःख–हैरानी दिने उजुरी बढेपछि सवारी परीक्षण कार्यालय, इटहरीका प्रमुख र लेखापाललाई जिम्मेवारीबाट हटाएका छन्।
कार्यालयमा सेवाग्राहीसँग हुने अनियमितता र दुरुपयोगका घटनाबारे मन्त्रालयमा उजुरी पुगेपछि मन्त्री घिसिङले तत्काल कारबाही गर्ने निर्णय गरेका हुन्। सेवाग्राहीलाई दुःख दिने मात्र नभई प्रमुख र लेखापालले मिलेमतोमा राजस्वसमेत हिनामिना गरेको आशंका गरिएको स्रोतले जनाएको छ।
कार्यालयको आन्तरिक छानबिनका क्रममा अनियमितताको तथ्य प्रमाण जुटाइने र आवश्यकताअनुसार थप कानुनी प्रक्रिया अघि बढाइने मन्त्रालयले स्पष्ट पारेको छ।
मन्त्री घिसिङले जिम्मेवारीप्रति लापरबाही गर्ने, सेवाग्राहीलाई ठग्ने वा राज्यको राजस्वमा आँच पुर्याउने कसैलाई पनि बर्दाश्त नगर्ने चेतावनी दिएका छन्।
