नयाँ दिल्ली । बुधबार बिहान दिल्लीको मालवीय नगरस्थित हौजरानी क्षेत्रमा रहेको लेमन ग्रीन रेस्टुरेन्टमा भीषण आगलागी हुँदा कम्तीमा २० जनाको मृत्यु भएको छ भने ३८ जना घाइते भएका छन् ।
आगलागीको सूचना बिहान करिब ८ः५० बजे प्राप्त भएपछि दिल्ली दमकल सेवाले तत्काल १० वटा दमकल गाडी घटनास्थलमा पठाएको थियो । दमकलकर्मीहरूले लामो प्रयासपछि आगो नियन्त्रणमा ल्याएका छन् । अहिले पनि उद्धार कार्य जारी रहेको छ ।
प्रारम्भिक जानकारीअनुसार आगो रेस्टुरेन्टको बेसमेन्टबाट सुरु भएको हुन सक्ने अनुमान गरिएको छ । बेसमेन्टबाट केही मानिसलाई गम्भीर अवस्थामा उद्धार गरिएको बताइएको छ । घाइतेहरूलाई नजिकैको म्याक्स अस्पतालमा उपचारका लागि भर्ना गरिएको छ । केही व्यक्तिहरू अझै भवनभित्र फसेको आशंका गरिएको छ, जसका कारण उद्धार कार्य जारी छ ।
आगलागीको वास्तविक कारण अहिलेसम्म खुलेको छैन । दिल्ली प्रहरी र प्रशासनले घटनाको विस्तृत अनुसन्धान सुरु गरेको छ । यो घटना दिल्लीको मुकुन्दपुर क्षेत्रमा एक दिनअघि भएको भवन भत्एिको घटनापछि आएको हो, जसमा एलपीजी सिलिन्डर विस्फोटको आशंकामा १० जना घाइते भएका थिए ।
