काठमाडौ ।सरकारले अनलाइन मिडिया तथा सामाजिक सञ्जालमा अपुष्ट, भ्रामक र तथ्यहीन सामग्री प्रकाशन तथा प्रसारण नगर्न आग्रह गरेको छ।
बुधबार प्रेस विज्ञप्तिमार्फत सरकारले यस्ता गतिविधिले समाजमा भ्रम फैलाउने र सार्वजनिक शान्ति तथा सुरक्षामा असर पार्न सक्ने जनाएको छ।
‘विगत केही समयदेखि विभिन्न अनलाइन मिडिया तथा सामाजिक सञ्जालहरूमा अपुष्ट, भ्रामक र तथ्यहीन समाचारहरू प्रकाशन तथा प्रसारण भइरहेका सम्बन्धमा सरकार तथा सुरक्षा प्रति नागरिकको विश्वास कमजोर हुने अवस्थाको सिर्जना भइरहेको हुँदा यस्ता गतिविधिमा संलग्न नहुन सम्बन्धित सबैमा अनुरोध गरिएको छ,’ विज्ञप्तिमा भनिएको छ।
साथै, अनलाइन सञ्चारमाध्यम र सामाजिक सञ्जाल प्रयोगकर्ताहरूलाई जिम्मेवार र संयमित भएर सामग्री प्रकाशन तथा साझेदारी गर्न अनुरोध गर्दै आधिकारिक पुष्टि नभएका समाचार वा सूचना प्रसारण नगर्न र स्रोतको विश्वसनीयता सुनिश्चित गर्न विशेष ध्यान दिन पनि आग्रह गरिएको छ।
‘कुनै पनि व्यक्तिको मानमर्दन हुने, सामाजिक सद्भाव खल्बल्याउने तथा राष्ट्रिय सुरक्षामा असर पर्ने किसिमका सामग्री प्रकाशन तथा प्रसारण नगर्न सम्बन्धित सबैमा सचेत गराइएको छ,’ विज्ञप्तिमा भनिएको छ।
सरकारले कुनै पनि व्यक्तिको प्रतिष्ठामा आँच पुर्याउने, सामाजिक सद्भाव खल्बल्याउने वा गलत सूचना फैलाउने कार्य कानुनअनुसार दण्डनीय हुने स्पष्ट पारेको छ।
सञ्चारमाध्यमहरूलाई पत्रकारिताको आचारसंहिता पालना गर्न र तथ्यमा आधारित सामग्री मात्र सार्वजनिक गर्न आग्रह गरिएको छ।
सूचनाको आवश्यक परे सम्बन्धित निकायसँग सम्पर्क गरी आधिकारिक जानकारी लिन सरकारले आग्रह गरेको छ।
Artha Sanjal
