काठमाडौं। काठमाडौं महानगरपालिकाले नागरिकता सिफारिस प्रक्रिया अब अनलाइनमार्फत सञ्चालन गर्ने निर्णय गरेको छ। महानगरपालिकाले चैत १ गतेदेखि अनलाइनबाटै नागरिकता सिफारिस गर्ने भएको हो ।
गृह मन्त्रालय र जिल्ला प्रशासन कार्यालयको सहयोगमा महानगरपालिकाको सूचना प्रविधि विभागले वडा सचिवलाई केन्द्रीय नागरिकता व्यवस्थापन प्रणालीको प्रयोगात्मक अभ्यास गराएर युजर नेम र पासवर्ड प्रदान गरेको छ।
यो नयाँ प्रणालीबाट अब नागरिकता सिफारिसका लागि वडा सचिवहरूले विवरण प्रविष्टि, कागजात प्रमाणित गरेर स्क्यान कपी राख्ने र अनलाइन पठाउने कार्य गर्न सक्नेछन्। यसमा, नागरिकता सिफारिसको सम्पूर्ण प्रक्रिया डिजिटल माध्यमबाट सञ्चालन हुनेछ जसले गर्दा कागजी प्रक्रिया र समयको खपत घट्नेछ।
गृह मन्त्रालयको कार्यान्वयनमा ल्याएको यो प्रणाली २० जिल्लाका २,५०० वडामा कार्यान्वयन गरिएको छ र काठमाडौं महानगरपालिकाले यसलाई अहिलेबाट सुरु गर्दै छ।
सूचना प्रविधि विभागका अनुसार, यस प्रणालीमा दुई वटा मोड्युलहरू छन्—इन्टरनल र एक्सटर्नल। यसका माध्यमबाट नागरिकताको प्रक्रिया अझै सरल र प्रभावकारी बनाउन मद्दत मिल्ने विभागको भनाइ छ।
