काठमाडौँ । ताप्लेजुङ प्रशासनले जिल्ला सदरमुकाम र आसपासका क्षेत्रमा अनिश्चितकालीन निषेधाज्ञा जारी गरेको छ । आइतबार बिहान ५ बजेबाट लागू हुनेगरि अनिश्चतकालीन निषेधाज्ञा जारी गरिएको प्रमुख जिल्ला अधिकारी नेत्रप्रसाद शर्माद्वारा जारी विज्ञप्तिमा उल्लेख छ ।
शनिबार रातभर नो केबलकार समूह र प्रहरी बीच जिल्ला सदरमुकाम फुंगलिंगमा झडप भएको थियो । निषेधाज्ञा जारी भएका स्थानमा ५ जना भन्दा बढी भेला हुन पाइने छैन ।
निषेधाज्ञा जारी भएको स्थानमा जुलुस धर्ना र सभा समेत गर्न रोक लगाइएको छ। स्थानीय प्रशासन ऐन २०२८ संशोधन सहितमा भएको व्यवस्था अनुसार जिल्ला प्रशासन कार्यालय ताप्लेजुङले फुंगलिंग नगरपालिका बजार क्षेत्रको पूर्व सल्लेरी, पश्चिम घोडे चौर, उत्तरमा उकाली पानी र दक्षिणमा शेर्पा टोल सम्म र केबलकार निर्माण भइरहेको स्थान काफ्ले पाटी क्षेत्रमा पनि निषेधाज्ञा जारी गरिएको छ ।
