वासिङ्टन । अमेरिकाको ह्वाइट हाउस नजिक शनिबार भएको गोलीकाण्डमा एक जना सर्वसाधारण घाइते भएका छन् भने गोली चलाउने संदिग्ध प्रहरीको जवाफी कारबाहीमा मारिएका छन्।
घटनाका बेला अमेरिकी राष्ट्रपति Donald Trump ह्वाइट हाउसभित्रै रहेका थिए।
साँझ करिब ६ बजे ह्वाइट हाउस आसपास गोली चलेको आवाज सुनिएको अमेरिकी सञ्चारमाध्यमहरूले जनाएका छन्।
अमेरिकी सिक्रेट सर्भिसका अनुसार १७औँ स्ट्रिट र पेन्सिलभेनिया एभेन्यु नजिक एक व्यक्तिले झोलाबाट हतियार निकालेर अन्धाधुन्ध गोली चलाउन थालेपछि सुरक्षाकर्मीले जवाफी फायर गरेका थिए।
गोली लागेका संदिग्धलाई अस्पताल लगिए पनि चिकित्सकले मृत घोषणा गरेका थिए।
घटनामा एक राहगीर घाइते भएका छन्। सुरक्षाकर्मी भने सुरक्षित रहेको जनाइएको छ।
राष्ट्रपति ट्रम्पको सुरक्षामा कुनै असर नपरेको ह्वाइट हाउसले जनाएको छ।
अमेरिकी सञ्चारमाध्यम सीबीएस न्यूजका अनुसार घटनाका क्रममा १५ देखि ३० राउन्डसम्म गोली चलेको थियो।
प्रारम्भिक अनुसन्धानमा संदिग्धले सिक्रेट सर्भिस एजेन्टमाथि गोली चलाउने प्रयास गरेको देखिएको छ।
एफबीआई निर्देशक Kash Patel ले घटनाबारे सिक्रेट सर्भिसले अनुसन्धान गरिरहेको बताएका छन्। राष्ट्रपति ट्रम्पले भने घटनाबारे सार्वजनिक प्रतिक्रिया दिएका छैनन्।
