काठमाडौं । ग्लोबल लर्नर्स एण्ड एजुकेटर्स नेटवर्क नेपालले जग्गा खरिदका लागि सिलबन्दी बोलपत्र आह्वान गरेको छ । आज (मंगलबार) सूचना प्रकाशित गर्दै नेटवर्कले तीन दिन (कार्तिक २३) भित्रमा बोलपत्र पेश गर्न भनेको छ ।

केन्द्रीय कार्यालय राख्ने प्रयोजनका लागि कार्तिक ३ गते समाज कल्याण परिषद्ले स्वीकृति दिएसँगै नेटवर्कले प्रक्रिया अगाडि बढाएको हो । नेटवर्कले काठमाडौंको कागेश्वरी मनोहरा नगरपालिका १ अन्तर्गत कागेश्वरी मन्दिरबाट दक्षिण, आलापोट एरियाबाट उत्तर, सुन्दरीजलबाट पूर्व र कागेश्वरी मनोहरा १ वडा कार्यालयबाट पश्चिम पर्ने गरी गागलफेदी वरपरको कम्तिमा १२ देखि २० आना क्षेत्रफलको चार सुर मिलेको जग्गा खरिद गर्न चाहेकाे हो ।

नेटवर्कको सूचनाअनुसार जग्गा एकै प्लटमा हुनुपर्नेछ भने जग्गालाई छुनेगरी अस्थाई वा स्थायी रुपमा कम्तिमा १० देखि १२ फिटको बाटो निर्माण भइसकेको हुनुपर्ने छ । कार्यालय प्रयोजनका लागि भएको हुँदा मुख्य बाटोबाट एक कित्ताभित्र पर्ने, तर गहिराइ वा डुबान नहुने ठाउँ हुनुपर्ने कम्पनीको सूचनामा उल्लेख छ । कम्पनीले प्रतिआना अधिकतम १५ लाखभन्दा कमको जग्गा मात्र खरिद गर्ने जनाएको छ ।

मिती : २१ कार्तिक २०८०, मंगलवार १३:५२ बजे प्रकाशित