एनसीसी बैंकलाई प्राप्ति गरेर एकीकृत कारोबार सुरु गरेको कुमारी बैंकले चालु आर्थिक वर्ष २०७९/८० को दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ ।
सो अवधिसम्म बैंकले १ अर्ब १ करोड रुपैयाँ बढी नाफा आर्जन गरेको छ। गत वर्ष यही अवधिसम्म बैंकले ९५ करोड १७ लाख रुपैयाँ रहेको छ । यो अवधिसम्म बैंकको वितरणयोग्य मुनाफा २२ करोड ४४ लाख रुपैयाँ रहेको छ।
दोस्रो त्रैमाससम्म बैंकलाई १ अर्ब ५७ करोड रुपैयाँ सञ्चालन मुनाफा भएको छ। गत वर्ष यही अवधिसम्म यस्तो मुनाफा १ अर्ब ३६ करोड रुपैयाँमा सीमित थियो।
समीक्षा अवधिसम्म बैंकले ४ अर्ब २४ करोड रुपैयाँ खुद ब्याज आम्दानी गरेको छ । गत वर्ष यही अवधिमा बैंकको यस्तो आम्दानी २ अर्ब ६२ करोड रुपैयाँ रहेको थियो। यो हिसाबले ब्याज आम्दानी ६१.६४ प्रतिशतले बढेको छ।
पुस मसान्तसम्म बैंकको निष्क्रिय कर्जा (एनपीएल) बढेर ३.१५ प्रतिशत पुगेको छ । गत वर्ष यही अवधिसम्म एनपीएल १.०६ प्रतिशतमा सीमित रहेको थियो।
समीक्षा अवधिमा बैंकको वार्षिकीकृत प्रतिसेयर आम्दानी (ईपीएस) थोरै घटेर ११.६७ रुपैयाँ कायम भएको छ। गत वर्ष यही अवधिमा ईपीएस १२.९४ रुपैयाँ रहेको थियो। बैंकको मूल्य अनुपात आम्दानी (पीई रेसियो) १६.२८ गुणा, प्रतिसेयर नेटवर्थ १४७.१७ रुपैयाँ र तरलता अनुपात २०.०९ प्रतिशत रहेको छ।
चुक्तापुँजी २६ अर्ब २२ करोड रुपैयाँ रहेको बैंकको जगेडा कोषमा १२ अर्ब ५ करोड रुपैयाँ सञ्चित छ । समीक्षा अवधिसम्म बैंकले २ खर्ब ९९ अर्ब रुपैयाँ निक्षेप संकलन गरी २ खर्ब ७५ अर्ब रुपैयाँ कर्जा परिचालन गरेको छ।
अर्थ सन्जाल