निर्माणको जिम्मा लिएर काम पूरा नगर्ने प्रधानमन्त्री तथा माओवादी केन्द्रका अध्यक्ष पुष्पकमल दाहालका घरबेटी शारदाप्रसाद अधिकारीसहितका ठेकेदार कम्पनीहरूलाई काठमाडौं उपत्यकाका १५ सडक आयोजना निर्माण पूरा गर्न उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठले १५ दिने अल्टिमेटम दिएका छन् ।

काठमाडौं उपत्यकामा सडक निर्माण लगायतको सरकारी ठेक्का पाएको लामो समयसम्म काम पूरा नगर्ने ठेकेदार कम्पनीका प्रतिनिधिलाई मन्त्रालयमै बोलाई समयसीमा निर्धारण गरी काम सम्पन्न गर्न निर्देशनसहित लिखित प्रतिबद्धता गराइएको हो ।

प्रचण्ड परिवारसहित बस्दै आएको खुमलटारको घरका मालिक शैलुङ कन्सट्रक्सनका ठेकेदार अधिकारी हुन् । उनी लगायतले सडक निर्माणको ठेक्का लिएर अलपत्र पार्दै आएका छन् । जसको सार्वजनिक रूपमा विरोध भए पनि सरकारले कारबाही गरेको छैन ।

बिहीबार सिंहदरबारस्थित मन्त्रालयमा बोलाएर उपप्रधानमन्त्री श्रेष्ठले काम लिएर समयमा सम्पन्न नगर्ने ठेकेदारहरूबाट निश्चित समयमा पूरा गर्ने लिखित प्रतिबद्धता लिएका हुन् । काठमाडौंका ६, भक्तपुरका ४ र ललितपुरका ५ ठेक्का अलपत्र पार्ने निर्माण व्यवसायीका प्रतिनिधिलाई बोलाएर अल्टिमेटम दिइएको हो ।

मिती : २८ पुष २०७९, बिहीबार २१:४५ बजे प्रकाशित