साताको दोस्रो कारोबार दिन आज (सोमबार) पनि सेयर बजारको उकालो यात्राले पनि निरन्तरता पाएको छ । आज सेयर बजार २.१६ प्रतिशतले बढेको हो ।

आज सेयर बजार मापक नेप्से परिसूचक ४६.७६ अंकले बढेर २२११.३८ बिन्दुमा उक्लिएको छ । लामो समयपछि सेयर बजारले २२ सयको बिन्दु पार गरेको हो । नयाँ सरकार गठनसँगै उकालो यात्रा तय गरेको सेयर बजार २२ सयको बिन्दु चुमेको छ ।

यता ठूला तथा बलिया कम्पनीको कारोबार मापक सेन्सेटिभ परिसूचक ८.१६ अंकले बढेर ४१९.८४ अंकमा उक्लिएको छ ।

कारोबार अवधिभर २५७ कम्पनीको १ करोड ४६ लाख ७६ हजार २०६ कित्ता सेयर खरिदबिक्री भएको छ । उक्त सेयर ५ अर्ब ३१ करोड ४३ लाख ७ हजार रुपैयाँमा किनबेच भएको नेप्सेले जनाएको छ । कारोबार रकम भने आइतबारको तुलनामा थोरै घटेको छ । सोमबार ५ अर्ब ४५ करोड ९९ लाख २५ हजार रुपैयाँको कारोबार भएको छ ।

यस दिन होटल एण्ड पर्यटन समूहबाहेक अन्य सबै सूचकमा हरियाली छाएको छ।

आइतबार कारोबार भएको १७३ कम्पनीको सेयरमूल्य बढ्दा ३१ कम्पनीको सेयर मूल्य घटेको छ । ६ कम्पनीको सेयरमूल्य भने स्थिर रहेको छ ।

आज बरुण हाइड्रोपावर, खानीखोला हाइड्रोपावर,छ्याङ्दी हाइड्रोपावर, जोशी हाइड्रोपावर, हिमालय उर्जा विकास कम्पनी, युनियन हाइड्रोपावर, सिंगटी हाइड्रोपावर खप्तड हाइड्रोपावर, राधि विद्युत र बाराही हाइड्रोपावर कम्पनीको सेयर मूल्यमा सकारात्मक सर्किट लागेको छ ।

आज हाइड्रोपावर समूहतर्फ लगानीकर्ताको आकर्षण देखिएको छ । सो समूहको सेयरमूल्य ४.९४ प्रतिशतले बढेको छ ।

मिती : २५ पुष २०७९, सोमबार १५:२२ बजे प्रकाशित