नेकपा एकीकृत समाजवादीका अध्यक्ष माधव नेपालले धेरै विश्लेषण गरेर मात्रै सरकारलाई विश्वासको मित दिने बताएका छन् । सरकार कुन ढंगले अगाडि बढ्छ त्यसलाई हेरेर मात्रै उसलाई विश्वासको मत दिनेबारेमा निर्णय लिन सकिने उनले बताए ।

शुक्रबार सर्वदलीय बैठकपछि नयाँबानेश्वरस्थित संसद् भवन परिसरमा सञ्चारकर्मीहरुसँगको कुराकानीमा उनले व्यक्तिगत रूपमा आफू प्रधानमन्त्री पुष्पकमल दाहाल प्रचण्डप्रति सकारात्मक रहेको धारणासमेत राखे । ‘विश्वासको मतको बारेमा हामीले जम्मै पक्षहरुको विषयमा विश्लेषण गर्नेछौं’ अध्यक्ष नेपालले भने, ‘व्यक्तिगत रूपमा प्रचण्डजीप्रति मेरो पोजिटिभ नै धारणा छ । जहाँसम्म सरकार कुन ढंगले अगाडि बढ्छ, त्यो हेरिकन हामी टुंगो गर्छौं । सरकारलाई विश्वासको मत दिन हामीले त धेरै विश्लेषण गर्नुपर्छ । विश्लेषण गरेर बल्ल टुंगोमा पुग्नुपर्छ ।’

अध्यक्ष नेपालले एमालेसँग एकता गर्ने विषयमा ठोस प्रस्ताव नआएको पनि स्पष्ट पारे । ‘एमालेसँग एकता गर्ने विषयमा मलाई कसैले पनि केही भनेको छैन’, उनले भने, ‘व्यक्तिगत भावना राख्नेहरूको बेग्लै कुरा भयो । मप्रति सदभाव राख्नेहरुको कुरा बेग्लै हो । सद्भाव राख्नेहरु सबैलाई धन्यवाद छ । कुनै ठोस कुरा भएका छैनन् ।’

मिती : २२ पुष २०७९, शुक्रबार १८:३१ बजे प्रकाशित