नेपाल राष्ट्र बैंकले अब वार्षिक मौद्रिक नीति हरेक आर्थिक वर्ष सुरु भएको पहिलो साताभित्रै सार्वजनिक गर्ने भएको छ । राष्ट्र बैंकले मौद्रिक नीति तर्जुमा कार्यविधि, २०७३ को प्रथम संशोधन गर्दै मौद्रिक नीति सार्वजनिक गर्ने समय सीमा निर्धारण गरेको हो ।

संशोधित कार्यविधिकाअनुसार चालु आर्थिक वर्ष सुरु भएको एक साता भित्र (नयाँ आर्थिक वर्ष सुरु भएको ७ दिनभित्र) मौद्रिक नीति सार्वजनिक गर्नुपर्ने हुन्छ । जसअनुसार अब साउन ७ गतेभित्र मौद्रिक नीति सार्वजनिक गर्नुपर्छ ।

त्यसैगरी त्रैमासिक तथा अर्धवार्षिक समीक्षा हरेक त्रैमास समाप्त भएको ३० दिनभित्र सार्वजनिक गरिने व्यवस्था कार्यविधिमा गरिएको छ।

राष्ट्र बैंकको आर्थिक अनुसन्धान विभागले वार्षिक मौद्रिक नीति तर्जुमाका लागि जेठ महिनाको दोस्रो हप्ताभित्र र त्रैमासिक तथा अर्धवार्षिक समीक्षाका लागि हरेक त्रयमास समाप्त भएको १५ दिनभित्र मौद्रिक नीतिका लागि आवश्यक राय सुझाव माग गर्न पत्राचार गर्नेछ ।

प्राप्त राय–सुझावउपर आवश्यकताअनुसार वार्षिक मौद्रिक नीति तर्जुमाको लागि प्रत्येक वर्षको असार महिनाको पहिलो हप्तादेखि र त्रैमासिक तथा अर्धवार्षिक समीक्षाको लागि हरेक त्रैमास समाप्त भएको १५ दिनपछि अन्तरविभागीय सुझाव समन्वय समितिमा छलफल गरिने व्यवस्था संशोधित कार्यविधिमा गरिएको छ।

अन्तर विभागीय सुझाव समन्वय समितिमा छलफल सम्पन्न भएपछि मौद्रिक नीतिको मस्यौदाउपर व्यवस्थापन समितिमा छलफल प्रारम्भ गरिने राष्ट्र बैंकले व्यवस्था गरेको छ।

यसअघिका वर्षहरुमा मौद्रिक नीतिका लागि समय सीमा निर्धारण नहुँदा र परिवर्तित सरकारको हस्तक्षेपले गर्दा चालु आर्थिक वर्ष सकिएको एक महिनासम्म पनि मौद्रिक नीति सार्वजनिक हुन सकेको थिएन ।

मिती : २१ पुष २०७९, बिहीबार ०८:३० बजे प्रकाशित