एनआईसी एशिया बैंक नेपाली सेयर बजारमा वाणिज्य बैंकहरुमध्ये सबैभन्दा महंगो सेयर मूल्य हुने बैंक बनेको छ । सेयर बजारमा सबैभन्दा कहलिएको नबिल बैंकलाई उछिन्दै एनआईसी एशिया सबैभन्दा धेरै सेयर मूल्य हुने बैंक बनेको हो ।

सोमबार यो समाचार तयार पार्दासम्म नबिल बैंकको सेयर मूल्य ७४३ रुपैयाँ पुगेको छ भने एनआइसीको सेयर मूल्य ७६५ रुपैयाँ पुगेको छ । यो नेप्सेमा सूचीकृत २५ वटा वाणिज्य बैंक मध्ये सबैभन्दा धेरै हो ।

नबिलले गत वर्ष २०७८/७९ को नाफाबाट ३० प्रतिशत लाभांश दिने घोषणा गरेको थियो । जसमा १८.५ प्रतिशत बोनस सेयर र ११.५ प्रतिशत नगद लाभांश दिने प्रस्ताव गरेको थियो ।

नाफाबाट घोषणा गरेको १८.५ प्रतिशत बोनस सेयरका आधारमा मूल्य समायोजन भएपछि सेयर मूल्यका आधारमा नबिल एनआईसीभन्दा पछि परेको हो । नबिल बैंकको १८.५० प्रतिशत बोनस सेयरमा मूल्य समायोजनपछि भाउ प्रतिकित्ता ७२१ रुपैयाँ १० पैसा कायम भएको थियो ।

विगत २ वर्षयता सेयरधनीलाई लाभांश खुवाउन नसके पनि पछिल्लो एक सातायता एनआईसीको सेयर मूल्य लगातार बढिरहेको छ । अन्य सबै सूचकमा अब्बल रहेको एनआईसी एशिया बैंकप्रति लगानीकर्ताको आकर्षण बढ्दै गइरहेको छ । राष्ट्र बैंकले तोेकेको केही प्रावधानहरु पूरा नहुँदा एनआईसीले गत वर्ष पनि लाभांश वितरण गर्न पाएको थिएन ।

लाभांश वितरण गर्न नपाएको एनआईसीको अन्य सूचक बलियो बन्दै गइरहेको छ । यता वर्षेनी बम्पर लाभांश दिँदै आएको नबिल बैंकको सेयर संख्या बढेसँगै पछिल्ला वर्षहरुमा सेयर मूल्य बढ्न सकेको छैन ।

हाल नेप्सेमा नबिलको २७ करोड ५ लाख कित्ता सेयर सूचीकृत छ भने एनआइसीको ११ करोड ५६ लाख कित्ता मात्र सूचीकृत । कर्जा, निक्षेप, खुद नाफा लगायत अधिकांश सूचकमा एनआईसी र नबिलको टक्कर रहँदै आएको छ ।

सबै सूचकमा अब्बल बन्दै एनआईसी

एनआईसी एशिया बैंकले आर्थिक२०७९–८० को प्रथम त्रैमाससम्म १ अर्ब ७५ करोड रुपैयाँ खुद नाफा आर्जन गर्न सफल भएको छ, जुन गत वर्षको तुलनामा ४९ प्रतिशतले बढी हो । त्यसैगरी वाणिज्य बैंकहरुमध्येकै सबैभन्दा धेरै हो ।

बैंकको स्व–पूँजीमा प्रतिफल (आरओई) २६.५५ प्रतिशत रहेको छ । यता, बैंकको वार्षिक प्रतिसेयर आम्दानी ५९ रुपैयाँ ६२ पैसा रहेको छ । यो तथ्यांकले प्रतिसेयर आम्दानी लगायतका प्रमुख सूचकहरु निकै आकर्षक र सबल रहेको डेखाउँछ । स्व–पूँजीमा प्रतिफल र प्रतिसेयर आम्दानी २६ वटै वाणिज्य बैंकहरूमध्ये सबैभन्दा बढी रहेको अनुमान बैंकले गरेको छ । बैंकले कर्जा असुलीमा पनि निकै उत्साहजनक नतिजा हासिल गर्न सफल भएको छ । जस अनुसार निष्कृय कर्जा अनुपात प्रथम त्रैमाससम्ममा ०.५९ प्रतिशतमात्र रहेको छ ।

बैंकले आर्थिक २०७९–८० को प्रथम त्रैमाससम्ममा २ लाखभन्दा बढी नयाँ ग्राहकहरू थप गर्दै ३४ लाखभन्दा बढी ग्राहकमाझ सेवा प्रदान गर्दै आइरहेको छ । यसै त्रैमाससम्ममा बैंकले कुल कर्जा लगानीको अंशमा करिब ८४ प्रतिशत साना तथा मझौला र रिटेल प्रकारका रणनीतिक क्षेत्रहरूमा कर्जा विस्तार गरेको छ । साना तथा मझौला कर्जा लगानीमा मुलुकका अन्य वाणिज्य बैंकहरू भन्दा यस बैंक अग्रणी स्थानमा रहेको बैंकको अनुमान छ ।

एनआइसी एसिया बैंक मुलुकमा सबैभन्दा धेरै बंैकिङ सञ्जाल विस्तार गरेको बैंक हो । यस बैंकले मुलुकभर ३५९ शाखा कार्यालयहरू, ४७३ एटिएम, १०३ वटा विस्तारित काउन्टर एवं ८१ वटा शाखा रहित शाखा सञ्जाल विस्तार गरेको छ ।

यस्तो छ नबिल बैंकको महत्वपूर्ण सूचक

चालु आर्थिक वर्षको पहिलो त्रैमाससम्म नबिल बैंकको खुद नाफा ४१.३० प्रतिशतले बढेर १ अर्ब ५७ करोड रुपैयाँ पुगेको छ । यसअवधिमा बैंकको खुद ब्याज आम्दानी र सञ्चालन नाफा दुवै बढेको छ । बैंकको खुद ब्याज आम्दानी ६४.०५ प्रतिशतले बढेर ३ अर्ब ६७ करोड रुपैयाँ पुगेको छ । सञ्चालन नाफा ४०.३८ प्रतिशतले बढेर २ अर्ब २३ करोड रुपैयाँ पुगेको छ ।

बैंकको प्रतिसेयर आम्दानी भने ५ रुपैयाँ १ पैसाले घटेर २७ रुपैयाँ ०१ पैसामा झरेको छ । गत वर्ष यसको प्रतिसेयर आम्दानी ३२ रुपैयाँ ११ पैसा रहेको थियो । यसको प्रतिसेयर नेटवर्थ २३३.२८ रुपैयाँ २८ पैसा छ ।

पछिल्लो समय एनआईसी एसिया बैंक र नबिल बैंकबीच कडा प्रतिस्पर्धा थालेको छ । सेयर बजारमा नबिलको नाम र सेयर मूल्य सधैँ उच्च हुने गरेमा अहिले एनईसी एशियाले टक्कर दिएको छ । ग्राहको मत जित्दै आएको सेयरधनीले सेयरधनीको पनि मन जित्दै आएको छ ।

मिती : १८ पुष २०७९, सोमबार १४:१४ बजे प्रकाशित