देशभर यो वर्ष धान उत्पादनमा वृद्धि भएको छ । कृषि तथा पशुपंक्षी विकास मन्त्रालयका अनुसार गत वर्षभन्दा करिब ७ प्रतिशतले धान उत्पादन बढेको हो ।

यो वर्ष गत वर्षको तुलनामा ४ लाख ३९ हजार ४६७ टन बढी धान उत्पादन भएको हो । गत वर्ष कुल ५० लाख ५७ हजार ५ टन धान उत्पादन भएकोमा यो वर्ष ५४ लाख ८६ हजार ५७२ टन उत्पादन भएको मन्त्रालयले जनाएको छ ।

धानको उत्पादकत्व पनि बढेको छ । पोहोरको तुलनामा यस आर्थिक वर्षमा धानको समग्र क्षेत्रफल २ प्रतिशत कमी आएको मन्त्रालयले जनाएको छ । समग्र उत्पादकत्वमा भने ९.१२ प्रतिशतले वृद्धि भएको छ ।

पोहोर प्रतिहेक्टर क्षेत्रफलमा ३.४१ टन धान उत्पादन भएकोमा अहिले ३.७९ टन उत्पादन भएको छ । मन्त्रालयका अनुसार देशभर चैते र वर्षे सिजनको गरी कुल १४ लाख ४७ हजार ७८९ हेक्टरमा धान उत्पादन भएको हो ।

मिती : १४ पुष २०७९, बिहीबार १६:५१ बजे प्रकाशित