नयाँ सरकार गठनसँगै सेयर बजारले गति लिएको छ । लामो समयदेखि शिथिल बनेको सेयर बजार सरकार गठन भएसँगै हरियाली बनेको हो ।

विशेष गरी राजनीतिक अवस्थाले सेयर बजारलाई ठूलो प्रभाव पार्ने हुँदा लगानीकर्ताहरुले आफ्नो मनोबल बढाउन सकेका थिएनन् । जसका कारण सेयर बजार बढ्न सकेको थिएन ।

सरकार गठनसँगै सोमबार र मंगलबार सेयर बजारमा उछाल आएको छ । नयाँ सरकार गठनपछि २ दिनमा सेयर बजारमा १६६.७३ अंकको उछाल आएको छ । सोमबार सेयर बजारमा ५६.८६ अंकले बढेको थियो । आज पनि सेयर बजारको उकालो यात्राले निरन्तरता पाएको छ । आज अर्थात् मंगलबर सेयर बजार मापक नेप्से परिसूचक ५९.८७ अंकले अर्थात् ३.११ प्रतिशतले बढेको छ । यो सँगै नेप्से परिसूचक १९८३.९५ बिन्दुमा पुगेर आजको कारोबार रोकिएको छ ।

राजनीतिक अन्यौताका बीच खस्किएको नेपाली सेयर बजार अब लयमा फर्कनेमा लगानीकर्ताहरु विश्वस्त छन् ।

यता ठूला तथा बलिया कम्पनीको मापन गर्ने सेन्सेटिभ परिसूचक पनि १०.६० अंकले बढेर ३८६.०५ बिन्दुमा उक्लिएको छ ।

कारोबार अवधिभर २६१ कम्पनीको एक करोड २० लाख २९ हजार ६०३ कित्ता सेयर खरिदबिक्री भएको छ । आज कारोबार रकममा समेत उछाल आएको छ । आज झन्डै ४ अर्ब हराहरीको कारोबार भयो । यस दिन ३ अर्ब ८८ करोड ४३ लाख ९६ हजार ९९७ रुपैयाँको सेयर किनबेच भएको नेप्सेले जनाएको छ । सोमबार अर्थात् हिजो २ अर्ब ९ करोडभन्दा माथिको कारोबार भएको थियो ।

यस दिन २०२ कम्पनीको सेयरमूल्य बढेको छ भएन ८ कम्पनीको मात्र सेयरमूल्य घटेको छ । २ कम्पनीको सेयर मूल्यमा भएन कुनै परिवर्तन आएको छैन ।

यस दिन ५ कम्पनीको सेयर मूल्यमा सकारात्मक सर्किट लागेको छ । सिद्धार्थ इन्स्योरेन्स, मल्टीपपर्स फाइनान्स, अजोड इन्स्योरेन्स र सृजनशील लघुवित्तको सेयरमूल्य १० प्रतिशतले बढेको छ भने धौलागिरी लघुवित्तको सेयर मूल्य ९.९९ प्रतिशतले बढेको छ ।

आँधीखोला लघुवित्तको सेयरमूल्य भने २.६३ प्रतिशतले घटेको छ ।

आज लक्ष्मी बैंकको सर्वाधिक २० करोड ९४ लाख ९० हजार रुपैयाँभन्दा बढीको कारोबार भएको छ । त्यसैगरी नेपाल टेलिकम, हिमालयन डिस्टिलरी, नबिल बैंक, एनआईसी एसिया बैंकको पनि १० करोड रुपैयाँभन्दा माथिको कारोबार भएको छ ।

लगानीकर्ताहरु नवनियुक्त अर्थमन्त्रीलाई सेयर बजारले स्वागत गरेको बताउँछन् । उनीहरु अब सेयर बजार बुम बुम हुने प्रतिक्रिया व्यक्त गरिरहेका छन् । अर्थमन्त्रीको आगमनसँगै सेयर बजारले नयाँ उचाइ लिनेमा लगानीकर्ताहरु विश्वस्त बनेका छन् । त्यति मात्र होइन अर्थमन्त्री र गभर्नर एउटै पार्टीको भएको हुँदा अर्थतन्त्रमा समेत सुधार आउने लगानीकर्ताको विश्वास छ ।

यतिमात्र होइन सरकारले तरलता संकुचन, उच्च ब्याजदर विदेशी मुद्राको सञ्चितिमा परेको दबाब तथा पुँजीबजारमा आएको गिरावटलाई सम्बोधन गरी अर्थतन्त्र गतिशील बनाउने निर्णय समेत गरेको छ । जसको कारण पनि लगानीकर्ताको मनोबल झनै बलियो बनेको छ । कतिपयले कारोबार रकममा समेत उछाल आएकोले ठूला लगानीकर्ता बजार प्रवेश गरेको आंकलन समेत गरेका छन् ।

मिती : १२ पुष २०७९, मंगलवार १५:२७ बजे प्रकाशित