नेपाल इन्भेस्टमेन्ट बैंक लिमिटेडको वार्षिक साधारणसभाले मेगा बैंक नेपालसँगको मर्जर प्रक्रिया स्वीकृत गरेको छ।

आज सम्पन्न बैंकको ३६ औँ वार्षिक साधारणसभाले मेगा बैंक र नेपाल इन्भेस्टमेन्ट बैंकबीचको मर्जर प्रयोजनका लागि संयुक्त मर्जर समितिको सिफारिसमा बैंकका सञ्चालक समितिले स्वीकृत गरेको १००:९० सेयर स्वाप रेसियोसम्बन्धी विशेष प्रस्ताव पारित गरेको छ।

सभाले विशेष प्रस्तावका रुपमा राखिएको मर्जर प्रक्रिया सम्बन्धमा भएका डीडीए रिपोर्ट, समझदारीपत्र तथा अन्तिम सम्झौतापत्रलगायत सम्पूर्ण कामकारबाही पनि पारित गरेको छ।

इन्भेस्टमेन्ट र मेगाबीच गत जेठ २७ गते मर्जरमा जाने प्रारम्भिक समझदारी भएको थियो। गत असार २२ गते राष्ट्र बैंकले इन्भेस्टमेन्ट र मेगाबीचको मर्जरलाई सैद्धान्तिक स्वीकृति दिएको थियो।

मर्जरपछि बन्ने बैंकको नाम ‘नेपाल इन्भेस्टमेन्ट मेगा बैंक’ रहनेछ। बैंकको प्रमुख कार्यकारी अधिकृतमा ज्योतिप्रकाश पाण्डे र अध्यक्षमा पृथ्वीबहादुर पाण्डे रहनेछन् भने नायब प्रमुख कार्यकारी अधिकृतको जिम्मेवारीमा रबिना देशराज जोशी हुने छिन्।

मर्जरपछि बन्ने बैंकको चुक्तापुँजी ३४ अर्ब ४२ करोड रुपैयाँ पुग्नेछ।

सभाले गत आर्थिक वर्ष २०७८–७९ को नाफाबाट सेयरधनीहरुलाई २०७९ असार मसान्तसम्म कायम चुक्तापुँजीको कुल ११ प्रतिशतले हुन आउने लाभांश वितरण गर्ने प्रस्ताव पारित भएको छ। प्रस्तावित लाभांशमा ४ प्रतिशत बोनस सेयर र ७ प्रतिशत नगद लाभांश रहेका छन्।

गत आर्थिक वर्षको वार्षिक प्रतिवेदन, लेखापरीक्षकको प्रतिवेदनलगायतका सम्पूर्ण दस्तावेजहरु स्वीकृत गरेको छ ।

मिती : ७ पुष २०७९, बिहीबार १६:०२ बजे प्रकाशित