मर्जर प्रक्रियामा रहेका हिमालयन बैंक र सिभिल बैंकले एकैदिन वार्षिक साधारणसभा आह्वान गरेका छन् । दुवै बैंकको सञ्चालक समितिको बैठकले वार्षिक साधारणसभा आगामी पुस २८ गते आयोजना गर्ने निर्णय गरेको हो।

हिमालयन बैंकको ३०औँ वार्षिक साधारण सभा होटल सोल्टी, सोल्टीमोड, काठमाडौँमा बिहान ११ बजे शुरु हुनेछ भने सिभिल बैंकको अमृतभोग, कालिकास्थान, काठमाडौँमा बिहान ११ बजे शुरु हुनेछ।

यी दुबै बैंकको सभाले हिमालयन बैंकले सिभिल बैंकलाई १०० बराबर ८०.२८ सेयर स्वाप रेसियो अर्थात सिभिल बैंकको १०० कित्ता बराबर हिमालयन बैंकको ८०.२८ कित्ता अनुपातमा सेयर आदानप्रदान गर्ने, प्राप्ति पश्चात हिमालयन बैंक लिमिटेडको नाममा एकिकृत कारोबार गर्ने, प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने विशेष प्रस्तावहरु पारित गर्नेछ।

यसका साथै हिमालयन बैंकको सभाले ८ प्रतिशतका दरले बोनस सेयर र सोको कर प्रयोजनार्थसहित ११.११ प्रतिशतका दरले नगद लाभांश वितरण गर्ने, सर्वसाधारण शेयरधनीहरुको तर्फबाट सञ्चालक समितिमा प्रतिनिधित्व गर्ने १ सञ्चालकको निर्वाचन गर्ने, लेखापरीक्षक नियुक्त गर्ने लगायतका प्रस्तावहरु पनि पारित गर्नेछ।

सिभिल बैंकको सभाले भने ५ प्रतिशतका दरले बोनस सेयर र सोको कर प्रयोजनार्थ ०.२६ प्रतिशतका दरले नगद लाभांश वितरण गर्ने, लेखापरीक्षक नियुक्त गर्ने लगायतका प्रस्तावहरु पनि पारित गर्नेछ।

साधारणसभा तथा लाभांश वितरण प्रयोजनार्थ हिमालयन बैंकले पुस १८ गतेदेखि २८ गतेसम्म बुकक्लोज गर्ने भएको छ भने सिभिल बैंकले पुस १९ गते बुकक्लोज गर्ने भएको छ। त्यसैले, पुस १७ गतेसम्म नेप्सेमा कारोबार भइ कायम हिमालयन बैंकका सेयरधनीहरुले बैंकको लाभांश प्राप्त गर्न र साधारणसभा लिन सक्नेछन् ।

पुस १८ गतेसम्म कायम सिभिल बैंकका सेयरधनीहरुले बैंकको सभामा सहभागिता जनाउन तथा बैंकले वितरण गर्ने लाभांश प्राप्त गर्न सक्नेछन्।

मिती : ७ पुष २०७९, बिहीबार ११:५५ बजे प्रकाशित