नेकपा माओवादी केन्द्रका अध्यक्ष पुष्पकमल दाहाल प्रचण्डले  प्रधानमन्त्री, राष्ट्रपति, सभामुख, प्रदेश प्रमुख, मुख्यमन्त्री लगायत राजकीय पदमा एकमुस्ट भागवण्डा गरिने बताएका छन् । उनले अबको बन्ने  राष्ट्रपति पनि राजनीतिक पृष्ठभूमिकै हुने समेत बताए । पार्टी केन्द्रीय कार्यालय पेरिसडाँडामा बसेको पदाधिकारी बैठकमा बोल्दै उनले जुनसुकै पार्टीबाट भएपनि राजनीतिक पृष्ठभूमि भन्दा बाहिरबाट नल्याइने समेत  बताए ।

‘अब बन्ने नयाँ राष्ट्रपति गैर-राजनीतिक पृष्ठभूमिको हुन्छ भन्ने चर्चा छ । त्यस्तो हुँदैन । जुनसुकै दलबाट आएपछि राजनीतिक पृष्ठभूमि हुने भन्ने गठबन्धनमा समझदारी भएको छ’ प्रचण्डको भनाई उदृढ गर्दै उपमहासचिव हरिबोल गजुरेलले भने, ‘विगतको इतिहास हेर्दापनि राजनीतिक पृष्ठभूमिको राष्ट्रपति बनाउँछौँ । त्यो भन्दा बाहिर नजाने समझदारी छ ।’

 प्रचण्डले आफूले प्रधानमन्त्रीमा सहयोग गर्न काँग्रेस सभापति एवं प्रधानमन्त्रीलाई प्रस्ताव गरेको बैठकमा ब्रिफिङ गरेका छन् । उनले भने – ‘मैले देउवा जीलाई मलाई प्रधानमन्त्री बनाउन सहयोग गर्नुस् भनेर प्रस्ताव राखेको छु । उहाँले संसदीय दलको नेता चयन भएपछि सोचौँला भन्नु भएको छ।’’

मिती : ३ पुष २०७९, आईतवार १९:२९ बजे प्रकाशित