नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले कालिगण्डकी नदीमा १५० मेगावाटको जलविद्युत परियोजना निर्माणको तयारी थालिएको बताएका छन् । म्याग्दी उद्योग वाणिज्य सङ्घको २९ औँ वार्षिक साधारणसभामा आज उनले यस्ताे बताएका हुन् ।

म्याग्दीभित्र पर्नेगरी कालिगण्डकी नदीको पानीबाट १५० मेगावाटको जलविद्युत परियोजना निर्माणको तयारी थालिएको छ । नेपाल सरकारले १५ सय मेगावाटको पीपीए गर्ने भन्ने निर्णय भइसकेकाले त्यही समयमा यस क्षेत्रको पनि पीपीए हुने उनको भनाइ छ । अन्य काम सबै भएकाले अब पीपीएपछि निर्माणको काम थालनी हुने ढकालले बताए ।

वरिष्ठ उपाध्यक्ष ढकालले देशैभरी हुने मेला महोत्सवहरू उद्योग वाणिज्य महासङ्घका सदस्यले मात्रै गर्नुपर्छ भन्ने माग आफूहरूले नेपाल सरकार समक्ष राखेको र त्यसलाई कार्यान्वयनको पाटोमा लैजाने पनि बताए ।

जिल्लाका स्थानीय तहहरूले सम्भावित आयोजनाहरू, हाइड्रो, पर्यटन, तथा सम्भावित पर्यटन प्रवर्द्धनको सम्भावना रहेको क्षेत्र पहिचान गर्नुपर्ने र त्यसको बारेमा आफूहरूले जानकारी पाएको खण्डमा त्यस क्षेत्रमा निजी क्षेत्रले लगानी गर्ने ढकालको भनाइ छ । कुनै पनि क्षेत्रमा उद्योग, व्यवसाय तथा उत्पादन मूलक क्षेत्र साझेदारीमा सञ्चालन गर्न प्रयास हुने उनले बताए ।

स्थानीय सरकारको तर्फबाट सकारात्मक प्रयास भएमा निजी क्षेत्रको साथ हुन्छ भन्दै कुनै पनि पूर्वाधार विकासको क्षेत्रमा निजी क्षेत्रका तर्फबाट भरमग्दुर प्रयास हुने उनले बताए । काठमाडौंको चन्द्रागिरि हिल्सजस्तै सातै प्रदेशमा पर्यटनका दृष्टिले उत्कृष्ट गन्तव्य पहिचान र लगानी गरिनु पर्ने उनले सुझाव दिए ।

नेपाल उद्योग वाणिज्य महासङ्घ ठूलो संस्था हो त्यसैले व्यावसायिक कठिनाइ समाधानका लागि पनि नेपाल सरकारसँग पहल गर्दै अघि बढ्नु पर्ने उनले बताए । देशैभरका कुनै पनि उद्योगी व्यापारीको समस्याको समाधानसम्बन्धी माग कडाइका साथ सरकारसमक्ष राखेर समाधानका लागि प्रयास गरिने ढकालले बताए ।

मिती : २४ मंसिर २०७९, शनिबार १४:५८ बजे प्रकाशित