रवि लामिछाने नेतृत्वको राष्ट्रिय स्वतन्त्र पार्टी (रास्वपा)मा समानुपातिक सांसाद चयनका क्रममा चलखेल भएको भन्दै केन्द्रीय कार्यालय बसुन्धारामा नेता–कार्यकर्ताले खबरदारी गरेका छन् । प्रतिनिधिसभा समानुपातिकतर्फ सांसद चयन प्रक्रियामा पार्टी विधि, पद्धति र सिद्धान्त मिचेर प्राइमरी इलेक्सन र बन्दसूचीको क्रमसंख्याभन्दा बाहिर गएर गरिएको भन्दै त्यसविरुद्ध नेता तथा कार्यकर्ताहरूले आज (बिहीबार) खबरदारी गरेका हुन् ।

रास्वपाले समानुपातिक उम्मेदवार छान्दा प्राइमरी इलेक्सन गरेको थियो । प्राइमरी इलेक्सनबाट धेरै मत ल्याएकाहरूलाई राखेर समानुपातिक उम्मेदवारको बन्दसूची बनाएको थियो । तर अहिले समानुपातिकतर्फ सांसद चयन गर्दा प्राइमरी इलेक्सनविपरीत गर्न खोजेको भन्दै विरोध भएको हो ।

आज पार्टी कार्यालयमा खबरदारी गर्न पुगेका सुनसरी जिल्ला सभापति लालविक्रम थापाले प्राइमरी इलेक्सनअनुसार नै समानुपातिक सांसद चयन गरिनुपर्ने माग गर्दै खबरदारी गरिएको बताए । ‘हामीले पार्टीमा डिजिटल डेमोक्रेसी सुरूवात गरेको हो। उम्मेदवार छान्दा प्राइमरी इलेक्सनबाट छानिएको हो,’ उनले भने, ‘समानुपातिक सूची बुझाउँदा पनि प्राइमरी इलेक्सनमा आएको मतका आधारमा नामहरू समावेश गरिएको हो । तर अहिले सांसद छान्दा प्राइमरी इलेक्सनलाई वेवास्ता गर्न खोजिएकोले खबरदारी गर्नुपरेको हो ।’

थापा गत ४ मंसिरमा सम्पन्न चुनावमा सुनसरी २ बाट प्रत्यक्षमा उठेर पराजित भएका थिए । रास्वपाले प्रत्यक्षतर्फ ७ सिट जितेको छ भने समानुपातिकतर्फ १३ सिट पाएको छ।

मिती : २२ मंसिर २०७९, बिहीबार १४:३२ बजे प्रकाशित