काठमाडौं । प्रतिनिधिसभा समानुपातिकतर्फको मतगणना कार्य सम्पन्न भएको छ । अहिले सबै जिल्लाबाट मतगणना सकिएको जानकारी आएको र मत रुजु गर्ने काम भइरहेकाले केही मत तलमाथि हुन सक्ने निर्वाचन आयोगले जनाएको छ । तर यो पद्धतिबाट निर्वाचित हुने ११० सिटमध्ये दलहरुले पाउने सिट संख्या भने करिब टुंगो लागिसकेको जनाइएको छ ।

आयोगका अनुसार कुल १ करोड ५ लाख ६० हजार ६७ मत सदर भएको छ । जसमा सबैभन्दा लोकप्रिय दल नेकपा एमाले बनेको छ । २८ लाख ४५ हजार ६४१ मतसहित एमाले पहिलो दल बनेको छ । यसअनुसार एमालेले ३४ सिट पाउनेछ । प्रत्यक्षतर्फ ४४ सिट जितेको एमाले ७८ सांसदसहित प्रतिनिधिसभाको दोस्रो दल बनेको छ ।नेपा

ली कांग्रेसले २७ लाख १५ हजार २२५ मत पाएको छ । यसअनुसार उसले ३२ सिट पाउने छ । प्रत्यक्षतर्फ ५७ सिट जितेको कांग्रेस ८९ सांसदका साथ प्रतिनिधिसभाको पहिलो दल बनेको छ । तेस्रो दल बनेको माओवादी केन्द्र ११ लाख ७५ हजार ६८४ मत पाएको छ । प्रत्यक्षतर्फ १८ सिट जितेको माओवादीले समानुपातिकबाट १४ सिट पाउनेछ । दुबै जोड्दा उसको ३२ सिट पुग्छ ।

समानुपातिकमा राष्ट्रिय स्वतन्त्र पार्टी (रास्वपा)चौथो धेरै मत पाएका छ । प्रत्यक्षतर्फ ७ सिट जितेको रास्वपाले समानुपाातिकतर्फ पाएको ११ लाख ३० हजार ३४४ मतका आधारमा १३ सिट पाउने छ । अघिल्लो पटक थ्रेस होल्ड कटाउन नसकेको राप्रपाले यो पटक ५ लाख ८८ हजार ३१३ मत पाएको छ । प्रत्यक्षतर्फ ७ सिट जितेको उसले समानुपातिकमा पनि ७ सिट नै पाउनेछ र १४ सांसदसहित संसदको पाँचौ दल हुनेछ ।

चन्द्रकान्त (सीके) राउत नेतृत्वको जनमत पार्टीले समानुपातिकतर्फ ५ सिट पाउने भएको छ । उसले समानुपातिकतर्फ ३ लाख ९४ हजार ६५५ मत पाएको छ । उपेन्द्र यादव नेतृत्वको जनता समाजवादी पार्टी (जसपा)ले ४ लाख २१ हजार ३१३ मत पाएर थ्रेसहोल्ड कटाएको छ र ५ सिट पाउनेछ ।

मतपरिणामअनुसार पूर्वप्रधानमन्त्री माधव नेपाल नेतृत्वको नेकपा एकीकृत समाजवादी, र लोकतान्त्रिक समाजवादी पार्टी (लोसपा)लगायतका दलले भने थ्रेस होल्ड कटाउनै नसक्दा राष्ट्रिय दलको मान्यता पाउनबाट वञ्चित भएका छन् । राष्ट्रिय दल बन्न तीन लाखभन्दा बढी मत टाउनुपर्ने भएपनि एकीकृत समाजवादी २ लाख ९८ हजार ३९१ मै सीमित रहन पुग्यो । चुनावअघि एक सार्वजनिक कार्यक्रममा यो पार्टीका अध्यक्ष नेपालले पार्टीले समानुपातिकमा २५ लाख मत ल्याउने दाबी गरेका थिए ।

यस्तै महन्थ ठाकुर नेतृत्वको लोसपाले १ लाख ६७ हजार ३६७ मत पायो । समानुपातिकतर्फ सुदीप रुवाली नेतृत्वको नेश्नलिस्ट पिलल्स पार्टीले सबैभन्दा थोरै भोट पायो । उसले २ हजार १८ मत मात्र पाएको छ ।

मिती : २१ मंसिर २०७९, बुधबार ०८:५१ बजे प्रकाशित