काठमाडौं । शनिबार नेकपा माओवादी केन्द्रले निर्वाचनको समिक्षा र सरकार गठनका बारेमा छलफल गर्दै अब आफ्नो नेतृत्वमा नयाँ सरकार गठन गर्न सक्ने सम्भावना खुला राख्ने निर्णय गरेको छ । निर्वाचनको परिणाम नआउँदै यस पार्टीले सरकार बनाउने कुरामा छलफल सुरु गरेको हो ।

शनिबार पार्टी केन्द्रीय कार्यालय कोटेश्वरमा बसेको बैठकमा जोसुकैसँग मिलेर गर्न सकिने विकल्पलाई खुल्ला राख्नेबारे छलफल भएको हो । नेकपा माओवादी केन्द्रले सरकार गठनका सन्दर्भमा सबै विकल्प खुला राख्ने निर्णय गरेको छ ।

बैठकपछि पत्रकारसँग कुरा गर्दै माओवादी उपाध्यक्ष कृष्णबहादुर महराले गठबन्धन छाड्ने निर्णय नगरेको तर अन्य विकल्पमा पनि आफुहरु तयार रहने बताए । बैठकमा अपेक्षा गरे अनुरुप प्रतिनिधिसभामा सीट आउन नसकेको समीक्षा भएको उनले बताए ।

पहिलो चरणमै आफूले सरकारको नेतृत्व गर्न पाउनुपर्ने दाबी गर्दैं आएको माओवादी बैठकले एमालेसँग पनि मिलेर सरकार बनाउने विकल्प खुल्ला राखेको छ । तसर्थ अध्यक्ष पुष्पकमल दाहाललाई कुन पार्टीले प्रधानमन्त्री दिन्छ त्यहि पार्टीलाई समर्थन गर्न सक्ने प्रबल सम्भावना रहेको पार्टी निकट स्रोतले जानकारी दिएको छ।

मिती : १७ मंसिर २०७९, शनिबार १९:५५ बजे प्रकाशित