पूर्वप्रधानमन्त्री तथा नेकपा एकीकृत समाजवादी पार्टीका अध्यक्ष माधवकुमार नेपालले अमेरिकासँग स्टेट पार्टनरशीप प्रोग्राम (एसपीपी) मा रहनु हुँदैन भन्नेमा सत्ता गठबन्धन एकमत रहेको बताएका छन् । आइतबार काठमाडौंमा सम्पादकहरूसँग भएको छलफलमा उनले सत्तारुढ सबै दल एसपीपीमा नेपाल सामेल हुनु हुँदैन भन्ने पक्षमै रहेको बताएका हुन् ।

यद्यपि एसपीपीबाट फिर्ता हुने सम्बन्धमा गठबन्धनमा औपचारिक छलफल नभएको उनको भनाइ थियो । उनले आइतबार बसेको गठबन्धन बैठकमा पनि नेपालले कुनै पनि सैन्य गठबन्धनमा रहँदनौं भनेर प्रस्ट अडान लिनुपर्नेमा सबैजसो नेता सहमत भएको बताए ।​

एसपीपीले नेपालमा तरङ्ग ल्याएको र एसपीपीकै कारण नेपाल द्वन्द्वको अखडा हुने हो कि भन्ने चिन्ता सर्वसाधारणमा रहेको भन्दै उनले यसबारे गठबन्धनको बैठक बोलाएर प्रस्ट पार्नुपर्छ भनेर आफूहरुले आजै प्रधानमन्त्रीलाई भनेको र यसमा प्रधानमन्त्री पनि सकारात्मक रहेको जनाए ।

‘मंसिरलाई आधार मानेर चुनाव गर्ने तयारी भइरहेको छ। अहिलेदेखि चुनावको तयारी गर्नुपर्नेछ। संघ र प्रदेश सभा दुवै चुनावसम्मै गठबन्धन कायम रहन्छ’, उनले भने। उनले अब गठबन्धनभित्र चुनावमा सिटबारे छलफल गर्न बाँकी रहेको बताए । स्थानीय तहको निर्वाचनमा भएका कमीकमजोरी सुधार्दै सत्ता गठबन्धन अघि बढाउने विषयमा छलफल भएको नेता नेपालको भनाइ छ ।

मिती : ५ असार २०७९, आईतवार १६:५१ बजे प्रकाशित