काठमाडौं । नेपाल लाइफ इन्स्योरेन्स कम्पनी लिमिटेडले नयाँ बोनस दर सार्वजनिक गरेको छ । कम्पनीले नेपाल बीमा प्राधिकरणबाट पुस १२ गते स्वीकृत भएपछि कम्पनीले आर्थिक वर्ष २०८०/०८१ को आर्थिक स्थितिको लेखाजोखा र दायित्व मूल्याङ्कनसम्बन्धी बीमाङ्कीय प्रतिवेदनका आधारमा नयाँ बोनसदर सार्वजनिक गरेको जनाएको छ ।
कम्पनीले यो अवधिका लागि बीमितलाई प्रतिवर्ष प्रतिहजारमा न्यूनतम ५५ रुपैयाँदेखि अधिकतम ८५ रुपैयाँसम्म बोनस प्रदान गर्ने निर्णय गरेको छ । यसमा सुरक्षित जीवन, जीवन ज्योति, ग्रामीण सावधिक, सावधिक लघु, केटाकेटी सुनिश्चित भविष्य तथा शिक्षा जीवन बीमा, जीवन लक्ष्मी र जीवद उदय एकल जस्ता बीमा योजना रहेका छन् ।
त्यसैगरी, सावधिक जीवन बीमालेखअन्तर्गतकै ‘नौलो सुरक्षित र नौलो केटाकेटी जीवन बीमा योजना’मा बिमितले बीमा अवधिअनुसार न्यूनतम ६५ रुपियाँदेखि अधिकतम ८२ रुपियाँसम्म बोनस पाउनेछन् । सोही बीमालेखको ‘जीवन समुन्नत बीमा योजना’ मा कम्पनीले बीमितलाई न्यूनतम ५६ रुपियाँदेखि अधिकतम ७० रुपियाँसम्म बोनस दिने घोषणा गरेको छ ।
सावधिक जीवन बीमालेखको ‘सुनौलो भविष्य जीवन बीमा योजना’ (विकल्प १ र विकल्प २) बीमा योजनामा कम्पनीले बीमा अवधिअनुसार न्यूनतम ६० रुपियाँ र अधिकतम ६५ रुपियाँसम्म बोनस दिने भएको छ ।
साथै, यही बीमालेखअन्तर्गतको ‘सुनौलो भविष्य जीवन बीमा योजना’ (विकल्प १– एकल बीमाशुल्क योजना) मा बीमितले न्यूनतम ५५ रुपियाँ र अधिकतम ६० रुपियाँसम्म बोनस पाउनेछन् ।
कम्पनीका अनुसार सावधिक तथा आजीवन बीमालेखको ‘जीवन साहारा र अनमोल जीवन बीमा योजना’ मा बिमितले न्यूनतम ६० रुपियाँदेखि अधिकतम ८२ रुपियाँसम्म बोनस पाउनेछन् ।
साथसाथै, अग्रिम भुक्तानी सावधिक बीमालेखको ‘जीवन सम्वृद्धि योजना’ मा बिमितले सबै बीमा अवधिमा ५० रुपियाँ बोनस पाउने कम्पनीले घोषणा गरेको छ ।
त्यस्तै, अग्रिम भुक्तानी सावधिक बीमालेखको सबै बीमा अवधिमा समेत कम्पनीले बिमितलाई समान ५६ रुपियाँ बोनस दिने घोषणा गरेको छ । यस बीमालेखमा धन वर्षा–१५ वर्ष, धन वर्षा–२० वर्ष, नौलो धन वर्षा, जीवन उन्नति, छोराछोरी र सदावहार जीवन बीमा योजना रहेका छन् ।
यसबाहेक कम्पनीले बिमितले कम्पनीको अग्रिम भुक्तानी सावधिक बीमालेको ‘नौलो जीवन सम्वृद्धि बीमा योजना’ को सबै बीमा अवधिमा ५६ रुपियाँ बोनस पाउने जनाएको छ । त्यसैगरी, अन्य बीमालेखको ‘जीवन सारथी योजना’ मा बिमितले बीमा अवधिअनुसार न्यूनतम ६२ रुपियाँदेखि अधिकतम ८५ रुपियाँसम्म बोनस पाउनेछन् ।
अर्थ सन्जाल