काठमाडौं । नेपालले हङकङ सिक्सेस क्रिकेटमा शुक्रबार इंग्लयाण्डमाथि ऐतिहासिक जित हात पारेको छ । नेपालले तीन पटकको च्याम्पियन इंग्ल्याण्डलाई ६ विकेटले पराजित गरेको हो ।

टस हारेर पहिला ब्याटिङ गरेको इंग्ल्याण्ड निर्धारित ६ ओभर सकिन १ बल बाँकी हुँदा सबै ६ विकेट गुमाएर ९७ रनमा रोकिएको थियो ।

नेपालका विवेक यादव र प्रतिश जिसीले दुई/दुई विकेट हात पार्दा नारायण जोशी र लोकेश बलमे एक/एक विकेट हात पारे । इंग्ल्याण्डका कप्तान रवि भोपाराले ४९ रन बनाउँदा समित पटेलले ३९ रन बनाए । इडी बर्नान्डले ५ रन बनाउँदा एलेक्स डेभिस, जार्डोन थमसनले खाता खोल्न सकेनन् । जेम्स कोल्स १ रनमा आउट भए ।

९८ रनको लक्ष्य नेपालले कुनै पनि विकेट नगुमाएर पूरा गरेको हो । नेपालले लक्ष्य ४.२ ओभरमा ९९ रन बनाउँदै पूरा गरेको थियो । नेपालको जीतमा कप्तान सन्दीप जोराले ५० रनको पारि खेलेर रिटाय्ड हट भए । उनले जम्मा १२ बल फेस गर्दा ६ छक्का र ३ चौका प्रहार गरे । यसैगरी लोकेश बलमे ११ बलमा २० रनको नटआउट पारि खेल्दा २ छक्का र एक चौका हिर्काए । राशिद खानले ५ बलमा २१ रनको नटआउट पारि खेले । उनले समान २ छक्का र चौका प्रहार गरे ।

नेपालविरुद्ध बलिङ गरेका जेम्स कोल्सले १.२ ओभरमा ४७ रन खर्चिए भने रवि भोपाराले १ ओभरमा १८ रन दिए । यसैगरी इडी बर्नान्डले १ ओभरमा २३ रन खर्चिदा समित पटेलले १ ओभरमा ८ रन दिए ।

मिती : १६ कार्तिक २०८१, शुक्रबार ११:२४ बजे प्रकाशित